CAESAR SERVIENS, BELLUM GALLICUM VII, 79
 
1 Interea Commius reliquique duces, quibus summa imperii permissa erat, cum omnibus copiis ad Alesiam perveniunt et colle exteriore occupato non longius mille passibus ab nostris munitionibus considunt.

2 Postero die equitatu ex castris educto omnem eam planitiem, quam in longitudinem tria milia passuum patere demonstravimus, complent pedestresque copias paulum ab eo loco abditas in locis superioribus constituunt.

3 Erat ex oppido Alesia despectus in campum. Concurrunt his auxiliis visis; fit gratulatio inter eos, atque omnium animi ad laetitiam excitantur.

4 Itaque productis copiis ante oppidum considunt et proximam fossam cratibus integunt atque aggere explent seque ad eruptionem atque omnes casus comparant.
1
Interea Commius reliquique duces,
   quibus summa imperii permissa erat,
cum omnibus copiis ad Alesiam perveniunt
et
   colle exteriore occupato
non longius mille passibus ab nostris munitionibus considunt.

2
   Postero die equitatu ex castris educto
omnem eam planitiem,
   quam in longitudinem tria milia passuum patere demonstravimus,
complent
pedestresque copias paulum ab eo loco abditas in locis superioribus constituunt.

3
Erat ex oppido Alesia despectus in campum.
Concurrunt
   his auxiliis visis;
fit gratulatio inter eos,
atque omnium animi ad laetitiam excitantur.

4
Itaque
   productis copiis
ante oppidum considunt
et proximam fossam cratibus integunt
atque aggere explent
seque ad eruptionem atque omnes casus comparant.