2 Labienus milites cohortatus, ut suae pristinae virtutis et secundissimorum proeliorum retinerent memoriam atque ipsum Caesarem, cuius ductu saepe numero hostes superassent, praesentem adesse existimarent, dat signum proeli.

3 Primo concursu ab dextro cornu, ubi septima legio constiterat, hostes pelluntur atque in fugam coniciuntur;

4 ab sinistro, quem locum duodecima legio tenebat, cum primi ordines hostium transfixi telis concidissent, tamen acerrime reliqui resistebant, nec dabat suspicionem fugae quisquam.

5 Ipse dux hostium Camulogenus suis aderat atque eos cohortabatur.

6 At incerto nunc etiam exitu victoriae, cum septimae legionis tribunis esset nuntiatum, quae in sinistro cornu gererentur, post tergum hostium legionem ostenderunt signaque intulerunt.

7 Ne eo quidem tempore quisquam loco cessit, sed circumventi omnes interfectique sunt.

8 Eandem fortunam tulit Camulogenus. At ei, qui praesidio contra castra Labieni erant relicti, cum proelium commissum audissent, subsidio suis ierunt collemque ceperunt, neque nostrorum militum victorum impetum sustinere potuerunt.

9 Sic cum suis fugientibus permixti, quos non silvae montesque texerunt, ab equitatu sunt interfecti.

10 Hoc negotio confecto Labienus revertitur Agedincum, ubi impedimenta totius exercitus relicta erant: inde cum omnibus copiis ad Caesarem pervenit.

2
Labienus milites cohortatus,
   ut suae pristinae virtutis
   et secundissimorum proeliorum retinerent memoriam
   atque
      ipsum Caesarem,
         cuius ductu saepe numero hostes superassent,
      praesentem adesse
   existimarent,
dat signum proeli.

3
Primo concursu ab dextro cornu,
   ubi septima legio constiterat,
hostes pelluntur
atque in fugam coniciuntur;

4
ab sinistro,
   quem locum duodecima legio tenebat,
   cum primi ordines hostium transfixi telis concidissent,
tamen acerrime reliqui resistebant,
nec dabat suspicionem fugae quisquam.

5
Ipse dux hostium Camulogenus suis aderat
atque eos cohortabatur.

6
   At incerto nunc etiam exitu victoriae,
   cum septimae legionis tribunis esset nuntiatum,
      quae in sinistro cornu gererentur,
post tergum hostium legionem ostenderunt
signaque intulerunt.

7
Ne eo quidem tempore quisquam loco cessit,
sed circumventi omnes interfectique sunt.

8
Eandem fortunam tulit Camulogenus.
At ei,
   qui praesidio contra castra Labieni erant relicti,
   cum
      proelium commissum
   audissent,
subsidio suis ierunt
collemque ceperunt,
neque nostrorum militum victorum impetum sustinere potuerunt.

9
Sic cum suis fugientibus permixti,
   quos non silvae montesque texerunt,
ab equitatu sunt interfecti.

10
   Hoc negotio confecto
Labienus revertitur Agedincum,
   ubi impedimenta totius exercitus relicta erant:
inde cum omnibus copiis ad Caesarem pervenit.