CAESAR SERVIENS, BELLUM GALLICUM VII, 46
 
1 Oppidi murus ab planitie atque initio ascensus recta regione, si nullus anfractus intercederet, MCC passus aberat:

2 quidquid huc circuitus ad molliendum clivum accesserat, id spatium itineris augebat.

3 A medio fere colle in longitudinem, ut natura montis ferebat, ex grandibus saxis sex pedum murum, qui nostrorum impetum tardaret, praeduxerant Galli, atque inferiore omni spatio vacuo relicto superiorem partem collis usque ad murum oppidi densissimis castris compleverant.

4 Milites dato signo celeriter ad munitionem perveniunt eamque transgressi trinis castris potiuntur;

5 ac tanta fuit in castris capiendis celeritas, ut Teutomatus, rex Nitiobrigum, subito in tabernaculo oppressus, ut meridie conquieverat, superiore corporis parte nudata vulnerato equo vix se ex manibus praedantium militum eriperet.
1
Oppidi murus ab planitie atque initio ascensus recta regione,
   si nullus anfractus intercederet,
MCC passus aberat:

2
   quidquid huc circuitus ad molliendum clivum accesserat,
id spatium itineris augebat.

3
A medio fere colle in longitudinem,
   ut natura montis ferebat,
ex grandibus saxis sex pedum murum,
   qui nostrorum impetum tardaret,
praeduxerant Galli,
atque
   inferiore omni spatio vacuo relicto
superiorem partem collis usque ad murum oppidi densissimis castris compleverant.

4
Milites
   dato signo
celeriter ad munitionem perveniunt
eamque transgressi trinis castris potiuntur;

5
ac tanta fuit in castris capiendis celeritas,
   ut Teutomatus, rex Nitiobrigum,
   subito in tabernaculo oppressus,
      ut meridie conquieverat,
      superiore corporis parte nudata
      vulnerato equo
   vix se ex manibus praedantium militum eriperet.