CAESAR SERVIENS, BELLUM GALLICUM VII, 2
 
1 His rebus agitatis profitentur Carnutes se nullum periculum communis salutis causa recusare principesque ex omnibus bellum facturos pollicentur

2 et, quoniam in praesentia obsidibus cavere inter se non possint, ne res efferatur, ut iure iurando ac fide sanciatur, petunt, collatis militaribus signis, quo more eorum gravissima caerimonia continetur, ne facto initio belli ab reliquis deserantur.

3 Tum collaudatis Carnutibus, dato iure iurando ab omnibus, qui aderant, tempore eius rei constituto ab concilio disceditur.

1     His rebus agitatis
profitentur Carnutes
       se nullum periculum communis salutis causa recusare
       +  principesque ex omnibus bellum facturos
pollicentur

2 et,
        quoniam in praesentia obsidibus cavere inter se non possint,
                ne res efferatur,
        ut iure iurando ac fide sanciatur,
petunt,
        collatis militaribus signis,
                quo more eorum gravissima caerimonia continetur,
        ne
                facto initio belli
        ab reliquis deserantur.

3     Tum collaudatis Carnutibus,
       dato iure iurando ab omnibus,
                qui aderant,
       tempore eius rei constituto
ab concilio disceditur.