CAESAR SERVIENS, BELLUM GALLICUM 4, 22
 
1 Dum in his locis Caesar navium parandarum causa moratur, ex magna parte Morinorum ad eum legati venerunt, qui se de superioris temporis consilio excusarent, quod homines barbari et nostrae consuetudinis imperiti bellum populo Romano fecissent, seque ea, quae imperasset, facturos pollicerentur.

2 Hoc sibi Caesar satis opportune accidisse arbitratus, quod neque post tergum hostem relinquere volebat neque belli gerendi propter anni tempus facultatem habebat neque has tantularum rerum occupationes Britanniae anteponendas iudicabat, magnum iis numerum obsidum imperat.

3 Quibus adductis eos in fidem recipit. Navibus circiter LXXX onerariis coactis contractisque, quot satis esse ad duas transportandas legiones existimabat, quod praeterea navium longarum habebat, quaestori, legatis praefectisque distribuit.

4 Huc accedebant XVIII onerariae naves, quae ex eo loco a milibus passuum VIII vento tenebantur, quo minus in eundem portum venire possent: has equitibus tribuit.

5 Reliquum exercitum Q. Titurio Sabino et L. Aurunculeio Cottae legatis in Menapios atque in eos pagos Morinorum, a quibus ad eum legati non venerant, ducendum dedit. P. Sulpicium Rufum legatum cum eo praesidio, quod satis esse arbitrabatur, portum tenere iussit.
1
   Dum in his locis Caesar navium parandarum causa moratur,
ex magna parte Morinorum ad eum legati venerunt,
   qui se de superioris temporis consilio excusarent,
      quod homines barbari et nostrae consuetudinis imperiti bellum populo Romano fecissent,
   seque ea,
      quae imperasset,
   facturos pollicerentur.

2
Hoc sibi Caesar satis opportune accidisse arbitratus,
   quod neque post tergum hostem relinquere volebat
   neque belli gerendi propter anni tempus facultatem habebat
   neque has tantularum rerum occupationes Britanniae anteponendas iudicabat,
magnum iis numerum obsidum imperat.

3
   Quibus adductis
eos in fidem recipit.
   Navibus circiter LXXX onerariis coactis contractisque,
   quot satis esse ad duas transportandas legiones existimabat,
   quod praeterea navium longarum habebat,
quaestori, legatis praefectisque distribuit.

4
Huc accedebant XVIII onerariae naves,
   quae ex eo loco a milibus passuum VIII vento tenebantur,
      quo minus in eundem portum venire possent:
has equitibus tribuit.

5
Reliquum exercitum Q. Titurio Sabino et L. Aurunculeio Cottae legatis in Menapios atque in eos pagos Morinorum,
   a quibus ad eum legati non venerant,
ducendum dedit.
P. Sulpicium Rufum legatum cum eo praesidio,
   quod satis esse arbitrabatur,
portum tenere iussit.