CAESAR SERVIENS, BELLUM GALLICUM 3, 17
 
1 Dum haec in Venetis geruntur, Q. Titurius Sabinus cum iis copiis, quas a Caesare acceperat, in fines Venellorum pervenit.

2 His praeerat Viridovix ac summam imperii tenebat earum omnium civitatum, quae defecerant, ex quibus exercitum magnasque copias coegerat;

3 atque his paucis diebus Aulerci Eburovices Lexoviique, senatu suo interfecto, quod auctores belli esse nolebant, portas clauserunt seque cum Viridovice coniunxerunt;

4 magnaque praeterea multitudo undique ex Gallia perditorum hominum latronumque convenerat, quos spes praedandi studiumque bellandi ab agri cultura et cotidiano labore revocabat.

5 Sabinus idoneo omnibus rebus loco castris sese tenebat, cum Viridovix contra eum duorum milium spatio consedisset cotidieque productis copiis pugnandi potestatem faceret, ut iam non solum hostibus in contemptionem Sabinus veniret, sed etiam nostrorum militum vocibus non nihil carperetur;

6 tantamque opinionem timoris praebuit, ut iam ad vallum castrorum hostes accedere auderent.

7 Id ea de causa faciebat, quod cum tanta multitudine hostium, praesertim eo absente, qui summam imperii teneret, nisi aequo loco aut opportunitate aliqua data legato dimicandum non existimabat.
1
   Dum haec in Venetis geruntur,
Q. Titurius Sabinus cum iis copiis,
   quas a Caesare acceperat,
in fines Venellorum pervenit.

2
His praeerat Viridovix
ac summam imperii tenebat earum omnium civitatum,
   quae defecerant,
   ex quibus exercitum magnasque copias coegerat;

3
atque his paucis diebus Aulerci Eburovices Lexoviique,
   senatu suo interfecto,
      quod auctores belli esse nolebant,
portas clauserunt
seque cum Viridovice coniunxerunt;

4
magnaque praeterea multitudo undique ex Gallia perditorum hominum latronumque convenerat,
   quos spes praedandi studiumque bellandi ab agri cultura et cotidiano labore revocabat.

5
Sabinus idoneo omnibus rebus loco castris sese tenebat,
   cum Viridovix contra eum duorum milium spatio consedisset
      cotidieque productis copiis
   pugnandi potestatem faceret,
      ut iam non solum hostibus in contemptionem Sabinus veniret,
      sed etiam nostrorum militum vocibus non nihil carperetur;

6
tantamque opinionem timoris praebuit,
   ut iam ad vallum castrorum hostes accedere auderent.

7
Id ea de causa faciebat,
   quod cum tanta multitudine hostium,
      praesertim eo absente,
         qui summam imperii teneret,
   nisi aequo loco aut opportunitate aliqua data legato dimicandum non existimabat.