CAESAR SERVIENS, BELLUM GALLICUM 2, 31
 
1 Ubi vero moveri et adpropinquare muris viderunt, nova atque inusitata specie commoti legatos ad Caesarem de pace miserunt, qui ad hunc modum locuti:

2 non se existimare Romanos sine ope divina bellum gerere, qui tantae altitudinis machinationes tanta celeritate promovere possent;

3 se suaque omnia eorum potestati permittere dixerunt.

4 Unum petere ac deprecari: si forte pro sua clementia ac mansuetudine, quam ipsi ab aliis audirent, statuisset Atuatucos esse conservandos, ne se armis despoliaret.

5 Sibi omnes fere finitimos esse inimicos ac suae virtuti invidere; a quibus se defendere traditis armis non possent.

6 Sibi praestare, si in eum casum deducerentur, quamvis fortunam a populo Romano pati quam ab his per cruciatum interfici, inter quos dominari consuessent.
1
   Ubi vero moveri et adpropinquare muris viderunt,
nova atque inusitata specie commoti
legatos ad Caesarem de pace miserunt,
   qui ad hunc modum locuti:

2
   non se existimare Romanos sine ope divina bellum gerere,
      qui tantae altitudinis machinationes tanta celeritate promovere possent;

3
   se suaque omnia eorum potestati permittere dixerunt.

4
   Unum petere ac deprecari:
      si forte pro sua clementia ac mansuetudine,
         quam ipsi ab aliis audirent,
      statuisset
         Atuatucos esse conservandos,
      ne se armis despoliaret.

5
   Sibi omnes fere finitimos esse inimicos
   ac suae virtuti invidere;
   a quibus se defendere
      traditis armis
   non possent.

6
   Sibi praestare,
      si in eum casum deducerentur,
      quamvis fortunam a populo Romano pati quam ab his per cruciatum interfici,
         inter quos dominari consuessent.