CAESAR SERVIENS, BELLUM GALLICUM 2, 23
 
1 Legionis VIIII. et X. milites, ut in sinistra parte aciei constiterant, pilis emissis cursu ac lassitudine exanimatos vulneribusque confectos Atrebates (nam his ea pars obvenerat) celeriter ex loco superiore in flumen compulerunt et transire conantes insecuti gladiis magnam partem eorum impeditam interfecerunt.

2 Ipsi transire flumen non dubitaverunt et in locum iniquum progressi rursus resistentes hostes redintegrato proelio in fugam coniecerunt.

3 Item alia in parte diversae duae legiones, XI. et VIII. profligatis Viromanduis, quibuscum erant congressae, ex loco superiore in ipsis fluminis ripis proeliabantur.

4 At totis fere castris a fronte et a sinistra parte nudatis, cum in dextro cornu legio XII. et non magno ab ea intervallo VII. constitisset, omnes Nervii confertissimo agmine duce Boduognato, qui summam imperii tenebat, ad eum locum contenderunt;

5 quorum pars ab aperto latere legiones circumvenire, pars summum castrorum locum petere coepit.

1
Legionis VIIII. et X. milites,
   ut in sinistra parte aciei constiterant,
   pilis emissis
cursu ac lassitudine exanimatos
vulneribusque confectos Atrebates
   (nam his ea pars obvenerat)
celeriter ex loco superiore in flumen compulerunt
et transire conantes insecuti
gladiis magnam partem eorum impeditam interfecerunt.

2
Ipsi transire flumen non dubitaverunt
et in locum iniquum progressi
rursus resistentes hostes
   redintegrato proelio
in fugam coniecerunt.

3
Item alia in parte diversae duae legiones, XI. et VIII.
   profligatis Viromanduis,
      quibuscum erant congressae,
   ex loco superiore
in ipsis fluminis ripis proeliabantur.

4
   At totis fere castris a fronte et a sinistra parte nudatis,
      cum in dextro cornu legio XII. et non magno ab ea intervallo VII. constitisset,
omnes Nervii
   confertissimo agmine
   duce Boduognato,
      qui summam imperii tenebat,
ad eum locum contenderunt;

5
quorum pars ab aperto latere legiones circumvenire,
pars summum castrorum locum petere coepit.