CAESAR SERVIENS, BELLUM GALLICUM 2, 21
 
1 Caesar necessariis rebus imperatis ad cohortandos milites, quam [in] partem fors obtulit, decucurrit et ad legionem decimam devenit.

2 Milites non longiore oratione cohortatus, quam uti suae pristinae virtutis memoriam retinerent neu perturbarentur animo hostiumque impetum fortiter sustinerent,

3 quod non longius hostes aberant, quam quo telum adigi posset, proelii committendi signum dedit. Atque in alteram item cohortandi causa profectus pugnantibus occurrit.

4 Temporis tanta fuit exiguitas hostiumque tam paratus ad dimicandum animus, ut non modo ad insignia accommodanda, sed etiam ad galeas induendas scutisque tegimenta detrahenda tempus defuerit.

5 Quam quisque ab opere in partem casu devenit quaeque prima signa conspexit, ad haec constitit, ne in quaerendis suis pugnandi tempus dimitteret.
1
Caesar
   necessariis rebus imperatis
ad cohortandos milites,
   quam [in] partem fors obtulit,
decucurrit
et ad legionem decimam devenit.

2
Milites non longiore oratione cohortatus,
   quam uti suae pristinae virtutis memoriam retinerent
   neu perturbarentur animo
   hostiumque impetum fortiter sustinerent,

3
   quod non longius hostes aberant,
      quam quo telum adigi posset,
proelii committendi signum dedit.
Atque in alteram partem item cohortandi causa profectus pugnantibus occurrit.

4
Temporis tanta fuit exiguitas hostiumque tam paratus ad dimicandum animus,
   ut non modo ad insignia accommodanda, sed etiam ad galeas induendas scutisque tegimenta detrahenda tempus defuerit.

5
   Quam quisque ab opere in partem casu devenit
   quaeque prima signa conspexit,
ad haec constitit,
   ne in quaerendis suis pugnandi tempus dimitteret.